Mi sort lir dann in péi i apèl koré di sid, néna in kantité jenn diplomé é banna lé roshèrché pou zot diplôme, zot formassion, épi zot konpétanss. Mé konm i di néna touzour bann grin dsab pou anspèsh la mashine tourné ;

Si tèlman i paré néna san sinkante mil jenn diplomé i rode pa travaye, pars zot lé pa bien dann travaye par rapor la fasson zot lé trété é biensir an kontroparti néna san sinkante mil post travaye i trouv pa lo moune k’i fo pou okip azot..

Mi di pa laba i trète déssèrtin travayèr konm shifon d’pyé mé banna na poin lo trètman k’i fo. Mé antanssion mi parl La Koré pars mi sort lir sa mé mi panss i doi an avoir dsi la tèr dé million é dé million d’travayèr demoune i fé shifon d’pyé avèk zot.

Mi di azot sa konmsa mé si possib alon rogarde otour d’nou pou oir si lé pa in pé konmsa galman issi shé nous ansa dan La franss kan noute bann jenn i sava.

Alé ! Ni artrouv pli dvan sipétadyé.

Justin