Promyé foi moin la antann kozman-la lété dan la boush in ga dann in boutik. Lo boutikyé i amontr ali son karné pou dir ali li doi in moné. Li karkiy lo zyé mé i diré li konpran pa bien l’afèr. L’èrla i di ali : « Bin, ou la pa parti l’ékol don ? ». Li fé pou répons : « Oui mé sinploman dovan la port ! ». I pé dir osi an plézantan, li la parti l’ékol di soir. Poitan zordi nana in kantité d’moun la parti lo vré l’ékol ziska z’ot sèzan mé soi zot la fine obli près tout, soi zot la pa tienbo gran soz. Sak i fé ké zot i soufèr bokou kan zot i gingn in lète ofisyèl, sansa kan i fo lir in konvokasyon tribinal, si tèlman ké zot lé blijé donn in kamarad pou gardé. L’èr demoun i koné dsi zot dé shoz k’i fodré pa. Alé ! Ni artrouv pli d’van sipétadyé !