Mézami koméla mi koné pa si i anparl ankor dé shoz konmsa mé dann tan, kan in madame lété an voi d’famiye, la grann pèr èl l’avé, sansa son mari, sé k’èl l’avé in l’anvi té pa kontanté, pars in l’anvi pa kontanté i marke.

Si i marke in l’androi lé pa tro vizib, lé bon, mé si i marke an plin dann milyé la figuir lété pi bon ditou. Sé pou sa ké lo mari téi fé l’inpossib pou kontante l’anvi son madam. Mé konm zot i koné in l’anvi lé pa touzour possib kontanté... Si par égzanp lo madam néna in l’anvi d’létshi kan lé pa la sézon, alé débarboite aou la-dan.

Mézami, mi di azot sa pars sa lété - mé pétèté lé ankor ? - in kroiyanss demoune. Alé mi di azot sa konmsa épi zot i fé sak zot i vé avèk. Sak i kroi, li kroi, é sak li kroi pa, li kroi pa mé li lé prévni kant mèm…

Alé ! Mi kite azot rofléshi la dsi é ni artrouv pli d’van, sipétadyé.

NB Si mi kroi diksyonèr Alain Armand in tash de vin dsi la po, sé in lanvi-naevus — i di sa konmsa.

Justin