Mi pans zot la fine antann sa é pli souvan k’in foi. Pars moun a dogré, sa i mank pa dan la vi. Tazantan lé an kolèr, tazantan lé kontan, tazantan bone imèr, tazanrtan mové z’imèr. Mi sort agard in fime dsi Kloklo (Claude françois), é inn an parmi lo bann partisipan té i di : « Sirman li té bi-polèr ! ». Konm moin la mark an-o la, nou kréol nou noré di, lo boug té par dogré. La pa ké ni apèl sa in maladi, mé sé in n’afèr bien difisil pou fé ansanm. Alor si dann z’ot voizinaz famiy néna demoun konmsa soi zot i fé avèk, soi zot i mète in lastik rant li épi zot… sirtou ké la vi lé kourt. Alé ! Mi lèss azot rofléshi la dsi é ni artrouv li d’van sipétadyé.