Mézami zot i koné, issi La Rényion, néna in rass demoune, ou na fortafèr avèk zot. Pou kossa ? Pars zot i yèm okipé. Sé konmsi toulmoune i doi rann azot dé konte pou toute zafèr, mèm sak lé pli pèrsonèl.

Néna rien a fèr avèk zot, zot i vé savoir lo ki, lo koman, lo pou kossa. Mèm in sinp zafèr si wi fé pa antanssion sa i pran in linportanss inkroiyab. Défoi, dann oute kèr, wi panss lé pa bon rakonte toute oute afèr. Alé souf sa dann zorèye in moune lé kapab fé annuir aou. Mé la pèrsone i panss pa konm ou. Dann son kèr èl i panss si èl i koné aou é si wi koné aèl, na pwin scélé dsi oute lang. Donk wi doi di toute.

Anfin, i pèz pa ou atèr pou obliz aou rakonté é si wi vé, wi garde dé shoz pou ou é wi di pa pèrsone sof si par féblèss wi di tro mé final de konte sé oute foté aou.

Alé ! mi kite aou fèr konm wi vé é ni rotrouv pli dvan, sipétadyé.

Justin