Pou pa shanjé , ni sar parl ankor in kou tram-train, pars la pa akoz in pé la déside finir avèk sa, ké ni doi fèrm nout také. Mi pans kan ou na rézon, i fo pa larg lo kor. Ziska in pé i an apèrsoi, zot la fé in bétiz pli gro k’zot tète. Pars pou in bétiz sé in bétiz !
Lo tam-train avèk la nouvèl route litoral, sa té i doi marsh ansanm-avèk,té dann mèm négosyasion avèk gouvèrnman. An plis ké sa, lété in moiyin pou donn kréol lo shoi rant toute bann kalité manyèr déplasé.Tram-train té vé pa la plass pou li tousèl, li té i vé in bon plass pou li. Tram-train oui, mé san koup la tète lo bus, é kar jone lété pa an danjé ditou. Tram-train té i vé pa non pli anpèsh demoun sak i vé pran zot loto pou déplass konm zot té i vé. In prèv ? La route tamarin… lo boute ké la fine fèr, plis ankor sak té i doi fèr pou trap la vil Saint Joseph. Tram-train lété pa prévi solman dépi Sainte Marie ziska Saint Paul mé dépi Saint Benoit ziska Saint Joseph.Tram-train té i vé pa tyé vélo, té i vé pa tyé bato. Toute té i doi marsh ansanm.
Pandan k’in pé lété apré fé zot mové kou, ala k’in télé dan La Frans, i trouv moiyin fé in roportaz déssi in séktèr k’i koné pa la kriz. Lakèl solon zot ? Zistoman lo tram-train. I fé sa partou dan la Frans épi dann l’Europ, partou pars sa i amène lo progré, lékonomi lénèrzi, é lo dévlopman dirab. Partou ? Sof issi. Sa in n’afèr i kol ar pa , sa !

 Justin