Pou tout sak konm moin l’avé zot konésans dann bann zané soisant ni koné konbien rèv la tourn dann nout tète épi dan la tète tout sak la vni apré. Lo rè d’in péi lé bon pou viv dodan ! Sa lé inportan sa.

Kosa, in soisantène zané pou révé, pou majiné, pou kalkilé, pou pans nout péi La Rényon ? Lé inposib in n’afèr konmsa ! Non, lé pa inposib vi ké dopi tout so tan-la sé sak nout parti kominis la majiné, la kalkilé, la rodé konm solisyon é tout son bann militan la partazé.

Lo parti ! Pa lo moun lété d’dan ! Bien antandi, lo parti épi lo moun lété d’dan : sak la milité, sak la bingn dann son zidé. Nou lé tousèl konmsaisi La Rényon dann sans pozitif pars dann sans négatif galman néna mé mi vé pa an parl de zot zordi.

M’a dir azot in kékshoz : pétète zot i kroira pa mé fransh vérité, nout parti lé tousèl pou viv konmsa dopi lo tan li égzis. An pliské sa kan ni di li sé in parti rényoné pou dévlop lo péi par é pou lo pèp rényoné, sa la pa pou farsé mé pars pou li konm pou nou la vérité sé sa. Sésa é anplis sé la solidarité avèk bann pé épi bann pèp vans pou an avoir in l’avnitr lib.

Zot i pans pa lé inportan tousa d’moun la milite dann nout parti, la pans konm li pans, la boir dann mèm sours in lo rovigoran, la fé travaye z’ot tète dann sans ni koné. Sèryèzman sa la pa in n’afèr inportan sa ? Lé inportan galman di é ardi in n’afèr konmsa.