Mi sort aprann in drol nouvèl dann in sobatkoz déssi KOI... I prétan dir DAEWOO i sort sign i kontra avèk gouvèrnman Madagascar pou loué in gran karé la tèr. Kan i di azot gran..., sé gran pou vréman : plis in milion zéktar. Lé si tèlman gran k’mi ariv mèm pa maziné konbien sa i fé... Mé dizon, i fé par-la rant kat épi sink foi La Rénion ; Oui kouzin !

Mé pou fé kossa i loué la tèr-la ? La pa pou fé in baz pou larmé o moin ? Bann zamérikin lé for la-dsi ! La pa pou fé in prizon ? Bann zamérikin i konète fé sa ! Non, sé pou planté : mayi li ; léguime li ; palmié pou fé luil li. Mé akoz i ashté pa kan ianmank aou in n’afèr ? Sak mi koné, sé k’kan ou la poin de ri, ou i ashté avèk in landroi na de ri. Kan ou na poin luil, ou i ashté avèk in landroi i fé luil sansa ou i ashté la fournitir k’i fo pou fé out luil.

Non, banna i pran la tèr a bay, pou pétète katrovin-disnévan, épi i pèy in loiyé... somanké i fé la rout, i mète in sort tram-train, i fé in por pars lé prévi Daewoo i mèt sis miliar dolar dann lékonomi le péi... Sa in bon sistèm sa ? Moin pèrsonèl, mi pans lé bon, konm lé pa bon.

Mi trouv le péi nana pou gagné, késtionn lékipman, késtionn travay pou son bann plantèr, shofèr pou amèn kamion, plis d’ot shoz mi koné pa... sa lé bon ! Mé pèrd le droi déssi in gran bout out péi, èt angazé ziska èt étranglé... pou moin, sa lé pa bon. Mazine in pé, le péi apré krèv la faim épi bann Koréen i pèt dan la grès avèk marshandiz i sort shé ou ? Sa in nafèr pou amèn la guèr.

Justin