Zot i koné so kozman-la, zot ? I di konmsa : “Si ou fèrm out boush, demoun lé riskab pran aou pou in kouyon ! Si wi rouv out boush, demoun lé riskab mazine ou sé inn pou vréman !”. Sa i fé pans amoin in sèrtène madam Lagarde, minis lékonomi. Lésans, lo pri i goumant vite, donkalor na dmoun i domann lo tantine pou diminié in pé lo bann taks léta i rapsol déssi... èl la fé pou répons : pran pa zot loto, pran in vélo, sansa bat a patt.

Moin lé sir bann moun lé blizé tiliz zot transpor tou lé zour, kozman-la l’arète dann zot gorz konm in zo lapin kan sa i pik an biang dann gozié.
Ala pa k’dann bidzé pou loutromèr, gouvèrnman i désid lo bann krédi pou pèy bann ti kontra va sort dann bidzé sokrétaria d’éta loutromèr, pou alé dann sèt lékonomi. Donk, madam Lagard sora lo gardien so larzan-la. Kosa i sa ariv bann moun la gran bézoin pti kontra-la pou gingn zot soso ? Kosa v’ariv bann péi konm la n’ot la gran bézoin sa pou fé tourn in pé mié lé shoz ?

Touléka, vi son kozman pou lésans, la pa bon donn aèl résponsab larzan bann kontra édé. Akoz madam-la, sa in razèr d’pinte sa !

Justin