Mésyé, Médam, La Sosyété koz èk moin sé koz èk in kouyon-sé o pyé d’lo mir k’i oi lo mason. La vi souvan défoi lé konmsa : ou i pans lé shoz i sava pass korèktoman é oila ké néna in linprévi sirtou si ou néna afèr demoun i fo pa fyé dsi. Ou i donn azot out konfyans mé out konfyans i ariv li lé mal plasé : la pèrsone lé pa fran ditou ; in kouto dé lam : kan ou i pans sé promyé lam li sava ansèrv, ala ké li ansèrv l’ot. Moun konmsa i di osi lé konm fèye vakoa..i koup troi koté é néna rien a fèr avèk sa. Alé ! Mi di azot sa pou zot rofléshi sèryèzman é ni artrouv pli d’van. Sipétadyé !