Mé zami, dann la médsine mi koné pa arien, moin lé nul é moin la poin la ont pou dir sa. Pou kosa ? Pars la médsine sa sé in n’afèr k’i fo aprann pou konète é kan ou l’aprann, la plipar d’tan, ou i koné in bout solman. Mèm bann médsine altèrnativ, pou konète, i fo aprann. Alor, tanmyé pou sak la aprann pars dann in sityasion konm sak ni viv lé sir zot lé pli itil ké moin é sa lé vré pou tout bann soignan. Zot tout, la plipar d’tan, néna in vokasyon é konm i di zot i fé pa solman in métyé-sansa plizyèr - mé zot i viv zot vokasyon.
Tanmyé pou zot épi bravo.

Mé ala in n’afèr i doi z’ète klèr rant nou : la syans sa sé in n’affèr pou bann syantifik. Lé vré tazatan néna an parmi sak i apèl bann vilgarizatèr é zot osi zot i koné in réyon. Mé kan zot i prétan aprann anou la syans a travèr la télé, mi trouv zot i pèrd zot tan. Sirtou kan zot l’apré asplik anou dé zafèr zot i koné mèm pa. Lé nouvo ! biensir lé nouvo ! Mé la pa pou sa zot va prétann amontr anou la syans kan èl lé an konstriksyon. La prèv, si ou i lir dsi l’internet i rakont aou blan in zour, landomin i di aou sa sé in fak, é sirtou i fo pa kroir sa. Bann éspésyalis la médsine zot osi zot i rant dan la dans, zot i kadans, é dann in ka konm ni koné ni pé dir souvan dé foi zot kadans lé mal kadansé. Sa lé vré dann maloya mé pa solman.

Alor, si konm moin, zot néna la féblèss suiv sak bann tète zèf i di dann bann zémisyon i dir dé zèr é dé zèr, é si zot i kroi ou l’apré oir dann télé koman la syans i konstrui, mi pans lé pli préférab zot i mète l’afèr, pa dan la min Bondyé, mé dann la min bann profésyonèl lé myé préparé ké nou pou fèr bann zafèr konmsa… Mi di pa tazantan i ansèrv pa kékshoz kansréti pou aprann in téknik i pé z’ète nésésèr pou ède out famiy, mé sirtou alé pa kroir ou i sava fé la syans an ranplasmann bann syantifik.

Zot va dir amoin afors rogard bann syantifik-bann médsin sirtou-débaté, ou i pé pans bann moun-la l’apré soubate dann in vré panyé d’krab, dann in vré foir d’anpoign pou in pé ramass l’or an bar é d’ot alé la pèsh pou atrap lékime. Sa lé vré, lo mond koméla lé konmsa, i fo ni koné é ni pèrd pa nout somèye pou sa. Mé mi pans pa lo vré solisyon sé ranplas bann syantifik, bann savan, par in tripoté d’moun kouyon. In n’afèr konmsa, la pa bézoin di mé tazantan i fo di in pé kant mèm.