Matante Zélida la ékrir Justin :
Mon shèr nové, mon spès salté,
La, i oi la vérité-la ! In pé la rod anbèt anou... fé prann anou blan pou noir. Kansa ? Kan lotrozour, in pé la vouli fé kroir anou La Réjion la donn larzan pou ède fé arète la grèv lésans. Alor, zordi, ni oi lo fion : donn zordi pou artrap démin. Trap déssi kossa ? Avèk in nouvo taks déssi lalkol, sak lé for, konm sak lé fèb, sak i fé issi, konm sak i sort déor. Zordi, ni oi bien z’ot zèst ! Touléka, zot lé for, mé la pa inn bougrès konm moin zot va niabou roul dan la farine. Tok ! pran sa pou toi !

Justin la fé aèl pou répons :
Mon vié matante, sak ou i di i étone pa moin. Sak i étone amoin, sé k’na d’moun pli informé k’ou i pran kozman konmsa pou larzan kontan... La Réjion la done in moné, sa lé vré ! Vik li lavé larzan, épi li té pankor déside sak i fo fé avèk, li té pankor mète sa dann in bidzé. Li la done in moné provisoir ? Sa lé pa vré pars "doné sé doné, roprann sé volé".
Apark’sa, la taks déssi lalkol, sé pou sèy fé konprann in pé k’i fo diminié boir. Kan le pri va goumanté, pé s’fèr zot va komans konprann. Pars, i ésplik, i ésplik, i ésplik ankor, tanpir k’i ésplik, tanpir k’i konpran pa mèm.
Apark’sa, galman, sé pou fé konprann bann prodiktèr lalkol k’i fo arète abiz déssi la féblès demoun, déssi z’ot maladi - pars lalkolism, sé in maladi ! - pou gonf z’ot pla, garni z’ot kont la bank ; konm i di : "fèr fortine !". Mèm si pou sa, i fo ruine la santé d’moun.
Sa la pa bon !

Justin