Matant Zélida la ékrir Justin :

Mon shèr nové, mon spès salté, rouj-de-fon divan l’éternité,
Vi koné i sort fé zéléksyon é vi koné osi bann rouj la pa gingn in bon rézilta. Sa lé bien vré ! Donk moin la déside prosiv azot ziska dann zot z « avatar ». Vi koné kosa i lé in z’avatar : sé kan in bondyé i shanj l’aparans. Parfoi li prézant tèl fason, parfoi li prézant in n’ot fason. Li lé touzour lo mèm mé li pran tout sort z’aparans. Pou kosa mi di sa ? Pars, bann rouj osi i nyabou shanj l’aparans. Zot osi zot nana z’ot prop zavatar : in zour dann in l’asosyasion, in zour dann in komité d’sosi ou d’sola, in zour vizaz dékouvèr, ki di ké zot lé pankor rant dan la po la droit, sansa dan la po sosyalis. Donk moin la désid prosiv azot ziska dann z’ot z’avatar é kroi moin, prosiv pou trapé, pa prosiv pou largé. Tok ! Pran sa pou toi.

Justin la f épou répons :

Mon pov vyé matant k’i koz touzour la boush rouvèr. Ala k’éstèr ou i tourn dann in fime la polis sékrète. Ou i pans lo moun nout parti lé paré pou rant dann d’ot parti o sinonsa d’ot l’asosyasion pou travay dann la klandéstinité. Moin pèrsonèl sé in n’afèr k’i ralré amoin plito mé domaz sa i sort dirèk dann l’imazinasyon déranzé. Si nou lé dann in l’asosyasion sé pou fé avans in koz donk fé in l’antant avèk demoun lé pa dann mèm parti k énou. Lé vré pou bann komité galamn.

Na kant mèm in n’afèr lé pa sogré, lé vizaz dékouvèr sé sak ni apèl nout politik l’union donk forséman pa avèk demoun onm nou san pour san. Sansa kèl soré l’intéré ? Zéro kalbas ! La pla si mank pou moin dévlop la politik l’inyon. Touléka sé ké sjhoz ni amenn dopi lontan : in tan té lo CRADS (comité républicain d’action démocratique é sosyal), in tan lété EDDE, in tan té l’alyans. Ou i oi matant, ni shanj pa é ni amenn touzour la politik konm ni désid dann nout kongré. Binssir, sa la pa in késtyonn z’avatar ? Tok ! Pran sa pou ou !