Matant Zélida la ékrir Justin :
Mon shèr nové, mon spès salté,
M’a dir aou in n’afèr. Moin lé bien kontan, an parmi bann rouj de fon, nana d’bon moun. Biensir, nana bann tèt piosh galman, mé bon moun, nana ! La prèv a konviksyon ? Dann bann zournal, la droite, i parl an bien d’in pé. Lé vré, i suif osi la fèss bann moskoutèr, mé i anparl de bien pou sak i aksèp pa la diktatir lo parti bann rouj de fon. Antansion ! Na mèm in pé i réklam zot libèrté d’pansé. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
M’a dir avou in n’afèr. Na in gran politik la di : « Si mon l’ènmi i di in bon z’afèr dsi moin, moin lé a d’mandé kèl kouyonade moin la fé ! ». Pars mon l’ènmi, sak li vé, zour konm nuit, sé détruir amoin, sé déform mon l’imaz dann zyé mon bann dalon, sé fé sak zot i gingn pou diviz anou rantre nou, épi afayi anou. Kan sa la fini, kan moin lé fine afayi, ksiak ! in kou, in sèl, li fout amoin atèr. Pars li sé mon l’ènmi, é moin sé son l’ènmi, é lo tan k’i pass i shanj arien. Tout bann kapitalis i pé di, konprador, tout bann i amass l’arzan dsi transpirasyon travayèr, tout sak i batay kont nout dévlopman, sa la pa nout z’amiz ditou. Sar zamé nout z’amiz !

Justin

NB : Nou la fine pass lo tan kroir Pèr-Noèl.