Mézami lé bien d’apitoiye anou dsi lo sor d’lé zot. Sa i prouv nou néna bonkèr é ké ni gnor pa kan lé zot moune, noute bann frère lé dann difikilté. Mé sé pa si noute bann frère zot ossi zot va panss anou. Mé pétète zot va di anou i fo ni konte dsi nou mèm é i arète konte dsi baton tonton pou travèrs la rivyèr. Mi konprandré azot pars pétète kan la shalèr sar fini pou lé zot siklone ra d’maré, tanpète é konpagni va lèv pou zot : dopi lo tan ni antan ké siklone sar pli for in zour ossinon l’ote lo tan siklone for va fini par arivé…

Mé si mi di sa, nou rényoné sansa toute sak konm nou i arète dann sid noute tourman ossi lé riskab d’arivé. Mézami konbien dogré i sava fé dann bann zékol lo toi an tol… Pa pli loin ké l’ané passé mwin la vi inn-dé amontrèr téi lèss la porte zot klass gran rouvèr l’aprémidi pars téi fé tro sho é sof mon lérèr, mé mi oi pa si l’aranz in pé bann klass tro sho. Mi oi pa non pli si bande la kantine la klimatizé. Alor kossa i sava arivé ? Apré lo nor, sar lo sid, é avèk lo mèm dérègloman klimatik é biensir pèrsone i sava pa rovoir lo kalandriyé l’ané skolèr.

Ni sorte pass plizyèr somen dann la frèsh mé ni atann pa nou lo fésho k’i sava fatig anou, fatig noute zanfan épi noute pti zanfan. A ! Biensir so bann gro jabo l’édikassion nassyonal néna arien a oir ladan. Aprétou la pa zot la fé lo fésho, la pa zot la ramenn siklone, l’oraz la pa zot non pli alor kossa k’zot i pé roprosh azot ? Arien ditou é si bann marmaye i trouv pa lénèrji pou travaye ébin la pa zot fote. Solission ? Kèl solission néna, l’om i komann pa la natir.. Oui mé li pé détrak aèl.

A bon antandèr, salu !

Justin