Kan la mèr lé kalm, lé trankil, mèm in kapitène na poin tro léspèryans i pé amène lo bato. Mé kan la mèr lé mové, kan bann roulo i kraz déssi la kok, kan bann kalité gran trou i rouv par dovan ou, kan i balans in koté épi l’ote koté, i pik lo né, i ardrèss lo bèk, i anfons, i anfons, konmsi li vé toush lo fon, la, i fo in kapitène nana léspéryans pou tir son bato dann malizé. Kan bato lé a-ké, li la pa bézoin son komandan, mé kan li lé paré pou fish an avan... l’èr-la, plis lo kapitène lé éspérimanté, plis lé bon.
Akoz mi di sa ? Pars nout péi lé dann tangaj, pars li pé anbèk dann in bon shomin dévlopman, konm pa… li pé mète anou anlèr konm ral anou déyèr, li pé pèrmète anou tir nout vanjans déssi l’istoir kolonyal, sak la pass son tan pou bar nout shomin. La limyèr i klèr amoin, konm mon dalon tamoul i di souvan : li oi si mi di la vérité, sinon si mi ramas mantèr.
Kan ou i distribyé trak, dé foi in kozman i fé sif out zorèy, dé foi galman in pti kolon kom ou i di in kozman, é ou i romak ou ossi, ou i kalkil konmsa. Donk na inn la di avèk moin épi avèk mon dalone, apré an avoir trap lo pti zournal nou té apré fané : « Moin ossi, mi pans la poin d’ote ké gramoun lé kapab amène i réjyon konmsa ! ».
Dann mon kèr, mi kalkil la pa bézoin an avoir gro-gro diplome… an avoir fé syans politik pou oir klèr... sa lé byin vré !

 Justin