Fir-a-mézir, la bann Sarkozy i mète an plas zot politik réaksionèr. Avansa, té in pé parèy, soman banna lavé in pé ont-ont, alor zot té i fé zot kou an misoukant san bate dsi léstoma. Zordi, bann droit la pi ont arien, zot lé fièr sak zot i fé, sak zot i pans : zot lé fièr zot filozofi.

Dann in mèm nuite, la voté dé zafèr lé grav :
Dabor, inn la déside fé in fishyé bann ras (i apèl sa "ethnie") soi-dizan pou oir si toute lé trété parèy. Lé ga ! In fishié i pé ansèrv in bon pé zafèr, bon konm mové zafèr : é si té ansèrv pou mète anlèr in vré politik rasis ? Zordi non, mé domin ? Vik plis i sava, plis bann droite i donn azot lo droi fé zafèr la loi zordi i pèrmète pa.

Dézyèm zafèr : nana so bann tèst ADN. Nou la fine kozé la-dsi. Lé vré, la modifié in pé, mé li lé touzour dan la loi pou in lékspérimantasion. Mèm sa ! Sa lé mové pou la libèrté de moun, zot sékirité, zot droi in vi privé, zot ségré d’famy.
Pou moin, dann in filozofi, i ansèrv soubasman bann désizion konmsa nana in bébète i apèl rasism. Sa lé danzéré é pliské !

Justin