Vap dsi vap, taks dsi taks, ala gouvèrnman i diriz la Frans ! La fine ariv konmsi zinpo demoun i pèy i ansèrv pi arien. Poitan, i sort vote in bidzé : normalman, Ii fo arèt konmsa ziska si lé bien néssésèr kant i ariv milié lané, arvote in koléktif bidzétèr. Non, wi antan, tazantan nana in nouvo taks, sansa i prévoi inn pou fé si, pou fé sa. I ariv mèm lo gouvèrnman i anons in taks va ansèrv in nafèr té pa prévi.

Dopi lané passé ziska koméla, la fine fé près in dizène zinpo. Nana bann franshiz médikal, lo taks déssi la vant poisson, in n’ot pou bann produi linformatik, épi déssi bann gro loto, ankor inn pou arsikl bann zaparèy demoun i ramène magazin. Azout sak i sar mète pou siprime la piblisité déssi la télé piblik. Étsétéra, étsétéra, la ké lo ra.

Pandan stan la, demoun i konpran pi arien kan toudinkou, zot i antann in kozman déssi lo pouvoir d’achat. Bin, bann taks-la, bann nouvo linpo, sa i goumante pa lo kou d’la vi sa ? Avèk tousa, bann nouvo linpo, la poin pou goumante lo pouvoir d’achat. Fransh vérité ! Sa la pi in gouvèrnman, sa in sharète shaviré !

Justin