Matant Zélida la ékrir Justin :

Mon shèr nové, mon spès salté, rouj de fon dovan l’éternité,
si mi di aou in n’afèr moin lé sir ou sa vni vèr avèk la zalouzi, moin lé sir sa i sa tourn out pyé d’kèr dovan déyèr, sé pa si inn-dé rant zot i risk pa gingn in kardyak. Kosa mi anparl d’apré ou ? Mi anparl bann bon la kontinuité téritoryal. A ! Zot i pansé lété fini avèk sa ! Zot i pansé gouvèrnman la gosh té i sava tyé sa dann l’èf ? Mank de po, la komans doné lo bann bon é moin lé sir demoun i sar foulé pou gingn se troi san éro, sa lé pa pou négljé, sa in n’afèr i kont sa. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
sa i étone pa moin de ou. Alor ala ou osi ou l’apré kriy par dsi lo toi pou in bon la kontinuité téritoryal. Par l’fète, sa in bon poul’moun, sa in bon pou angrès bann konpgni l’aviyon. Pars d’apré sak mi koné lo pri lésans i arète pa bésé mé lo pri biyé i arète pa goumanté. Lé vré sa i apèl pi la sirsarz karbiran, mé i apèl sa la sirsarz la konpagni ! koman lé pa vré ? Lé bien vré pars sé in gran patron Air-France la di sa dann télé. Donk shak konpagni na in sirsarz é si domin lésans i mète a rogoumanté ébin va romète in sirsarz karbiran an plis é va rogoumanté la prime la kontinuité. Va tir dsi ki ? Dsi ou, dsi moin, dsi inn, dsi l’ot. Va tir dann posh gosh pou armète in zékli dann posh droite... Konmsa zot i konpran la vi tok ! Pran sa pou ou !