Lindi soir, déssi RFO-Télé, l’avé in sobatkoz, èk in bon pé d’moun : sindika li, lasosyasyon li, politik li, épi in pé dmoun la vni pou dir kosa zot i anpans pou tir La Rényon dann lanboulkidi.

Fransh vérité, lété intérésan lo z’afèr. Pou mon par, moin la rotonir i bon pé d’shoz é an parmi sak Madam Dindar la di dossi lo RSA. Èl la di : in moun i gingn érémi i toush par-la sisan éro ; avèk lo èrèsa, li va gingn désan éro an plis pou in tavay moityé d’tan. Donkalor li va gingn ui-san, ui-san sinkant éro dann in moi.

Alor moin la kalkil sak mon parti rouz-de-fon i propoz : dé gran sèrvis, inn pou lanvironeman pou fé la toilèt la natir, inn pou bann pti boulo la proksimité pou ède in pé bann moun dann malizé. Kosa zot i anpans ?

Larzan érémi, sa lé la ! Larzan èrésa sa lé la galman ! É boulo nana, boulo i mank pa ! Lé ga, dizon i anploy sinkant mil pèrsone la-dan, plis lo moun k’i fo pou lankadraz, sa la pa in révolisyon pou nou, tousa dmoun apré travay ? Sa la pa in bon n’afèr sa ? Sa la pa in bon propozisyon sa ?

Myé k’sa, sa va mète in bon pé dmoun dann shomin la résponsabilité... Sa lé rézonab ! Sa lé valab !

Justin