Mézami étan pti mon famiye la viv Boi d’Nèf Sin-Dni. Dann tan-la l’avé pwin frézidèr. Romark l’avé pwin léstréssité non pli.

Pwinn kouran donk pwinn frézidèr, donk pwin d’lo glassé… Nout famiye téi rèss dann lékol é dann la kour lékol-la l’avé delo é téi koul toultan-toultan zour é nuite : in tiyo téi amenn delo é délo téi koul dann in gran marmite demi-ron téi koné arienk débordé kan li té plin épi kan lo téi koul téin vré park krapo..

An parlan d’lo : dizon té fré, défoi in pé tyède, mé lo méyèr lo lété sète la fontène Madam Toutou.

Madam Toutou téi rèst assé lwin d’lékol. An fète la fontène té pa dann son kour, lété dovan la kour l’ote koté d’shomin nou téi pass défoi pou alé bitassion mon papa.D’apré sak mi rapèl delo — la lété fré é l’avé in bon gou ; in gayar sours téi done ali bon gou-la. Nou téi sava pa rode delo toulézour pars konm mwin la di azot l’avé delo dan la kour lékol, mé kan téi ariv dimansh, lo zour téi fé lo méyèr ropa, papa té anvoye anou shèrch delo La Fontène madam Toutou.

Mi rapèl pi si nou téi sava rode lo-la tou lé dimansh onzèr. Pétète arienk dan l’été ! Mé antouléka kan nou téi sava rode lo-la, dabor nou téi boir a la soif ziska nout vant i klok par anndan épi nou téi ramenn in larozoir plin. A tab nou téi boir lo-la dimansh onzèr — mi rapèl téi ranpli in gargoulète la tèr kuite é ladan lo té toultan fré.

L’aprémi tazantan téi fé lo sikré épi téi partaz rante nou.. In vré néktar mi di azot.

A ! delo la fontène Madam Toutou sa lété in n’afèr toulbon, pou dir azot in lo arivé. Na pi d’lo konmsa koméla mé lo souvnir lé la.. Souvnir-souvnir dann tan mwin lété marmaye.

Justin