Té pa rar dann tan, dann milyé la matiné, kissoi in fiy, kissoi in garsson téi tonm féblèss dan la klass osinonsa dsi ban katéshis. Konbien fiye épi konbien garsson nou la vi vir dé l’èye dan la matiné. La plipar d’tan lété bann fiy pars bannn garsson téi pran toute zot tan pou vol gouyav, sansa mang, sansa zanbrozade — jamrose téi di sa. Défoi minm téi siss in kane pou gingn soutien avèk lo zi.

Pli d’in foi mwin la antann mon momon avèk mon papa dir : sirman marmaye-la la pa manzé yèr o soir, alor lé normal li tonm fèb. In foi mwin la domann pou kossa i done lo d’sèl, la réponn amwin pars lo dsèl i shass lo vèr an dsandan épi kan wi mète in gazon d’ri ansanm sa i done la forss — la forss pou atann lo manzé d’onzèr dann la kantine.

Dann tan-la demoune téi travaye mé san gingn lo pourkoi konm k’i fo. Mèm nou té départman franssé mé bann loi sossyal té pa apliké korèktoman ; doktèr Raymond Vergès téi bataye in bonpé kont lo gouvèrnman sossyalist pou gingn l’aplikassion la loi 19 mars 1946. Mo momon ti di : i aplike mé par shikète é té bien vré.

Kan téi téi angrèss koshon té pa tèlman pou manzé sirtou pou pèye lo bail lo térin. In pé téi vann delé mé pa pou zot zanfan boir mé plito pou nyabou pèye lo pli nésséssèr.

A bon antandèr salu !

Justin

NB-Bouzaron sé lo vante osinonsa léstoma — a pa konfonn avèk la poitrine -par shikète par pti pé-pti pé.