Moin nana in bon kamarad, pétèt mon méyèr kamarad . Na poin lontan mi sonn ali, pars moin la antann konm in son li té malad épi li doi rant l’opital. Li la réponn amoin kan in loto i marsh pa bien, li rant garaz, apré li marsh myé. Ala in kozman mi obli ar pa, kan v’ariv mon tour… Sof si mon motèr i kal d’in kou.

Mé la pa in késtyonn santé d’moun mi vé anparl zordi. Mi vé anparl lo santé nout péi. I fo dir, par raport mon poinn vizé, li marsh pa tro bien. Li lé bien par plas, mé par plas li lé malad. Par kèl plas ? Ni koné, pars nou lé abityé anparl sa, anparl tout lo bann limyèr lé o rouz mé nana osi lé dann l’oranz épi lo vèr. Mé sé lo bann limyèr dann lo rouz k’i kontant pa moin. Pars sé lo bann limyèr rouz k’i inkyète anou. Fransh vérité !

L’èr-la, moin lé a dmandé si i fo kontinyé roulé an aspéran ké fir-a-mézir lo bann voiyan i vir dann vèr… Kroi touzour, mé fyé pa tro ! Donk i fo mète nout péi dann gran garaz l’ékonomi, la sosyété, l’anvironeman épi la kiltir si sa i égzis ? In sinp réparasyon ? Mi pans pa ! Shanj motèr ? Plito ! Sansa shanj plis ké lo motèr ? Daoir sa mèm i apèl la riptir ni réklam dopi lontan.