Mi sort lir dann “Imaz press”, in l’aviyon la vol èk in biokarbiran fé èk dé sik kann. Sa la éspas dan la Frans. Lo laviyon té in airbus 321, é lo karbiran lé fabriké avèk dé sik kann i sort Brézil. L’avé par la dis pour san biokarbiran dann in rézèrvoir laviyon. Pétète zot i pans ni doi bat la min pou in sé-d’èv konm sa ? Pétète oui, pétète non. Pou kosa mi di sa ?

Pétèt oui, pars banna i apèl sa karbiran prop épi i ansèrv moin pétrol, karbiran sal konm tout demoun i koné. Sof ké lo karbiran prop la pa si prop ké sa, pars tout son bann transformasyon i fé pa san in bon doz gaz karbonik fané dan l’èr... I pé dir galman, i fo bate la min pars bann péi na poin pétrol i pé fabrik zot karbiran épi diminyé zot dépandans par rapor bann péi nana sak i apèl lor-noir. In pé i pé dir sa i pé ète in bon zafèr pou bann plantèr La Rényon, vik l’Erop l’apré koup la zèl nout plantasion kann... tout fason, sa i doi pa anpèsh anou dévlop lindistri bann sou-produi la kann. Donk, bravo !

Mé antansyon, nana pou diskité la dsi pars manzé osi nou la bézoin, é pa arienk nou, tout bann péi di mond avèk sirpèpléman la tèr. Koman k’i sava ranpli tout bann léstoma, tout bann boujaron bann milyar d’moun nana dsi la tèr é i sava an avoir plizanplis ? Si ou i tir dan out léspri larzan, si ou i éfas sistèm kapitalis, si ou i mèt anlèr partou la sifizans alimantèr. Kosa ou i di ? I fo plant do ri, lo blé, mayi, manyok, patat, légime, bann frui. I fo fé bann zindistri alimantèr... I pé di osi i fo arèt fors dsi la vyann, dsi poison, mèt in pé bann séréal, bann frui, bann légime a lonèr.

Soman, na in n’afèr lé bien domaz, linivèr lé pa solidèr. In pé i pans arienk gonf zot pla épi kont bann kot zanfan mizèr dann télé. Si i koz konm moin, sa lé vyé zé, vik limanité la gingn invant lo marshandiz an parmi bann marshandiz, lo marshndiz siprème, lo marshandiz puisans in ta ! lo marshandiz i rann aou frékantab : Larzan ! Ou i pé dane out l’am pou sa, dan la joi, dan la félisité. Sa mèm i pé mète aou anlèr ! Sa mèm osi i pé kapot aou dann kanal !

Justin