Zot i koné kosa i lé lo ko-dévlopman ? O moin zot la fine antann mo-la ? Di pa moin non, pars sa i fé in bon bout tan mi antann parl sa... Kosa i vé dir ? Dann lékonomi, sa i vé dir, i donn la min pou dévlopé, i donn la min inn-a-l’ot pou mète anlèr lékonomi...
Mé alor, kisa k’i gingn dann in n’afèr komsa ? Si sé in vré ko-dévlopman, toulmoun i doi ète gagnan. Pèrsone i doi pa rès déssi l’bor shemin.

Ni pé fé lo ko-dévlopman dann loséan Indyin si par égzanp, Komor li, Madégaskar li, Moris li, épi Sésèl, épi La Rénion, épi d’ot ankor i mète ansanm pou fèr lo ko-dévlopman dann lagrikiltir, dann la pèsh, dann linformatik, dann lénèrzi...
D’apré moin, sé sak i fodré ni fé, nout tout ansanm, pars nou lé voizin, pars nou na in gran bout listoir ansanm, pars nou nana intéré pou fé konmsa. Sirtou si ni vé dévir lo do avèk in mové passé !

Pétète kan mi di sa, in pé i pans sa sé koz an saz, pars nou v’alé pli loin, nou sar pli for, nou va règ nout problèm ansanm avèk, an solidarité... D’ot lé riskab dir : kozman-la sa parol anlèr, sé koz la boush rouvèr, sé koz pou pa la boush i pi.
Mé rant nou, kèl lé méyèr ? Kisa lé saz, kisa lé fou ? San trok langaz, mi di : ko-dévlopman, sa-mèm nou la bézoin ! Pars sa lé bon pou nout tout !

Justin