Oté ! Ala k’gouvèrnman i siprime larzan pou bann jène i vé fé in formasion kiltirèl dann péi déor !
Dann la zanm kisa ou l’apré sèy mèt zanbèk ? Kisa ou l’apré tash moiyin pas kal ? Kisa ou i vé annuir ou-la ? Oui, ou-mèm, méssié Jégo... Parié dann out léspri, ou lé apré annuir la réjion, pas kal Paul Vèrgès, mète tout kalité zanbèk pou anpèsh fé bon travay.

Ou ossi, ou l’apré fé out kanpagn éléktoral don ? Ou i voudré pa arsèrv anou lo kou d’mil nèf san soisant troi ? Kan la droit la trouv in kandida la-ba dan La Frans... Antansion, dann tan-la, konm diré lo patoi, "lo matin té i mète zèf poul, lo soir té i sort ti-kanar". Di pa moin ou i argrèt tan-la ! Somanké, konm ou lé pa profèt la-ba, ou i vé èt profèt issi ? I pass pi z’afèr konmsa ! Sa z’afèr lantikité sa ! Ou i kroi pa ?

Alon koz pli sérié ! Dann out manièr raz la pinte, koup krédi, invante tout kalité z’afèr la pa vré, la pa konsèy réjional ou l’apré annuir, la pa Paul Vergès pèrsonèl ou l’apré ravazé...
Sé bann jène ou l’apré annuir, sé zot i gingn lo kou dann sèt afèr, sé zot ou l’apré boush lavnir ! Épi sé La Rénion ou l’apré fé d’tor ! Konm in pé téi di : koup pa nou ! Sa nou v’alé di partou.

Justin