Kan l’ariv la rantré l’ékol, bann mèr La Rényon la konm déklar la guèr pars d’apré sak zot la di, zot l’avé poin lo moiyin pou fé bien marsh l’ékol. Bon gré, mové gré, té blizé fé la rantré mèm si la pa gingn satisfaksyon konm k’i fo. Zordi, d’isi d’laba, ou i antann bann paran ésplinn pars na moin pèrsonèl dan l’ékol : na poin asé sirvéyan é bann kantinyèr, d’apré sak zot i di, lé blizé travay konm bèf.... Aprésa, lété lo tour bann z’anploi-vèr pou ménas bar la rout si i ronouvèl pa zot kontra. Zot la gingn satisfaksyon, mèm si sé la Réjyon té forsé aport in ralonz l’arzan.

O fèt, i fo in zour ni koz dsi la manyèr Didier Robert épi son bann dalon i dépans l’arzan piblik épi i fane sa par isi par la-ba. Ziskakan ? Pèrsone i koné pa. Tout fason, lo préfé la poin pou trakasé vi k’nana in réjyon pou vni port ali sokour shak foi li la bézoin. Mésyé Préfé, mésyé Lurel, lo gouvèrnman li mèm lé bien éré oir in ga i mèt kiyèr dann marmit lé zot. Banna i doi dir : "Na d’gou Paul Vergès lé pi prézidan la Réjyon ! ». Pars si lé té lo ka, mi pans pa zot noré nyabou manipil konmsa. Donk, nou va artrouvé dsi lo poin-la.

Sanm pou moin, zordi na dé zafèr inportan. Inn, kan i mèt l’anploi sou pèrfizyon, lé pa bon rotir la pèrfizyon kan lo kor la pankor ropran favèr é kan li risk lo koma. Dézyèmman : z’afèr l’anploi édé épi z’anploi-vèr, sa i amontr kan ni di dan nout program i fo fé dé gran sèrvis piblik, pou bann boulo la proksimité é inn pou l’anvironman, nout program na rézon. Sé la politik gouvèrnman dsi la késtyonn l’anploi k’i done anou rézon ; par A plis B, ankor in foi, mèm si i tienbo pa kont.

Justin