Oté

Sa sé in klé lo mirak rényoné, é sa i fo bien prézèrvé !

Justin / 6 out 2013

Mi sort lir dann in zournal, tout in kantité d’moun, la-ba dan l’Alzéri, la parti an plin zour pou manjé dsi in plas piblik. Sa lé défandi, zot i koné, pars bann mizilman lé an plin dann pèryod ramasan. I prétan, si bann demoun la fé sa, sé pou protès kont l’islamizasyon la sosyété. Biensir, in n’afèr konm sa lé pa posib isi. Mé isi nou lé dann in sosyété laïk é la libèrté rolizyèz lé marké dan la déklarasyon lo bann droi de l’om. Donk sé in n’afèr normal pou nou, mé konm zot i koné, partou lé pa konm sa.

Kan mi di sa, i konvien toulmoun La Rényon, i pé di toulmoun an zénéral, mé fransh vérité, dan bann famiy i pé an avoir la mézantant par raport de sa. Moin pèrsonèl, mi koné désèrtin ka, mé boudikont, mi koné pa si sa i konsèrn in bonpé d’moun. Moin la antann in moun dir li lé pa kontan pars z’anfan son garson lé pa batizé katolik. Ou i pé, si ou i vé, anparl ali lé droi de l’om, di ali sé lo paran é non lo gran-paran ki désid l’édikasyon lo z’anfan. Ou i pé di osi, sa in rézon pou fashé, donk i fo fé antansion, mé ou na l’inprésyon ou na in mir dovan ou. 

Moin la antann osi in madam l’apré di, an parlann son bèl fiy... si èl la maryé èk son garson, èl i doi suiv osi la rolizyon son garson. La, la pa bézoin dévlop out l’argimantasyon, la pa bézoin asplik si, asplik la, dan tou lé ka, ou i bat a koté... Poitan, isi na in n’afèr na poin partou, na in dyalog intèr-rolizyé, é sa i pèrmèt bann roprézantan bann rolijyon bien diskité, bien pran pozisyon pou tèl shoz sansa pou in n’ot afèr. Mèm sak i di li kroi pa arien, li doi bénéfisyé so tolérans-la, pars kom moin la di, sa i ropoz dsi la déklarasyon lo droi dé z’om, é pi sa sé in klé pou in sosyété dan la pé.

Sé kant mèm sa in bon baz la sosyété rényonèz... In baz sak i apèl lo mirak rényoné. In n’afèr séryé i fo pa toushé. La pé, sa in n’afèr lé bon pou nou !

NB : La-dan mi parl pa bann zour féryé pou bann fèt sak lé pa katolik, moin lé pa kont par prinsip, mé m’a roparl de sa in zour san tardé.

Justin