Zordi d’apré sak mi antan dir néna désèrtin zélu i donn dann la modèrnité. Zot i parl aou d’in zéstyon modèrn, éfikas, in manyèr fèr i fé avans lé shoz vit é bien. Avèk an plis bèl-bèl salèr pou indé fis de... épi galman in moiyin détourn lo règloman pou lo rokritman dann lo fonksyon piblik lo téritoir.
La Réjyon i tonm shanpyon ladan é lo tan lé déza loin téi parl anou, san prèv, lo salèr Françoise Vergès, sansa sète Carpanin Marimoutou. Konbien banna té i doi gagné ? In sonm faraminèz. In la vi, l’ot la di, in n’ot lé prosh de la romarké. An toulékala bien sharj delo dann tan-la mé kan konm i di lo biye té dann la min la droite, èl la pa parti di an kosa lo salèr lété faraminé-mèm èl la obli sa pou pass a ote shoz. Ote shoz ? Oui, mète a la dispozisyon bann kopin é bann kokin in bon takon larzan.

Mi arète la avèk zot, mé désèrtènn komine la pa done non pli z’ot par lo shien. Zot osi, kisoi dann bann kominoté d’komine, kisoi dann bann gran komine la fé bann plas pou bann zami, bann fis, bann fiye, paran de… Néna dé foi ou lé a d’mandé kosa k’i ansèrv fé bann post konmsa.
I di komine sin-dni i sort fé in sosyété miks pou lo lanimasyon périskolèr. Lanimasyon périskolèr, Iégzis déza sa. Nou la koni bann kaz, bann foiyé, bann z’asosyasion é d’apré sak moin la antandi dir, bann zaktèr-la la fé z’ot boulo é bann marmaye té pa abandoné. L’avé poin zamé asé, mé sak lété la, la bien okip marmaye pars an plis bann monitèr lagingn la forasyon ki falé pou zoué z’ot rol.

Zordi, si ni kroi bann zoinal komine sin-dni i sort fé in sosyété miks pou lo périskolèr é sak i fé sa ziska zordi i komans gingn la krinitiv. Pou koué, sa sré pa in manyèr tir do ri dann z’ot boush ? Sa sré pa in manyèr mète azot sou kontrol politik ? Sa sré pa in moiin tir in boute dsi la rob fifine ?
Nou va oir ! Nou va oir biento ! Pars sa la pa in kékshoz i pé kashyète lontan, mèm garoté dann linz la modèrnité.