Koman in n’afèr konmsa lé posib ? Koman tout so bann gran péi la tardé konmsa pou dékouv lo corona-virus ? Sa sé in n’afèr mi trouv la pa normal ditou. Koman i pé atann tout la fine pété pou dékouv kékshoz konmsa ?

Ni koné in pé partou dsi la tèr toulmoun i éspyone toulmoun : méyèr zami, méyèr zènmi, i fo i mète in léspyon partou ousa la bézoin. Donk in l’éspyon sé in moun i antan, i oi, i dékouv épi i fé konète sak l’arivé, sak i doi arivé é i ariv, épi galman sak i doi arivé épi i ariv pa. Alor koman lé posib la tardé konmsa pou trouv l’avé in virus l’avé mité ? Mé virus-la la muté, li la komans atak partou, ziska k’i pé pi kashé.

I parétré nou l’ariv ousa nou l’arivé pars téi falé lo biznèss téi kontinyé. Sirtou ké bann zindis internasyono i diminyé pa tro. An kontrèr lété nésésèr li goumant, li goumant é li arète pa goumanté. Ziska lo zour lé pi posib kashé. Ni vé, ni vé pa mé zour-la i ariv é kan li ariv ébin ni oi sak i éspass dovan nout zyé.

Ni oi la pa la santé d’moun sé la priorité, mé larzan, lo profi lo biznèss é sé pou sa k’i pèrd lo tan, pèrd lo tan ziska k’in zour lé shoz i dézénèr pars lé shoz l’apré déjénéré é kan i déjénèr ni antan in pé apré di konm in bann gran konésèr : v’ariv in zour in virus va mité é tout la syans di mond i gingn ar pa bar son shomin. Vré pa vré, ni koné pa, mé alon méfyé kant mèm-si bann puisans larzan i vé bien. Si bann puisans larzan i désid pa aspèr in pé, aspèr in pé ankor, zis in pti grin-zis in pti gigine grin. Apré i oi. Kisa i oi par l’fète ?

Nou pti kolon, sa sé dé shoz k’i dépass anou, pars nou néna poin la formasyon pou sa, l’ékipman pou sa, épi lé konésans pou sa. Fransh vérité, sa sé dé shoz k’i dépass anou, sof kan sé nou k’i trap la maladi…