Pti marmaye mwin la gingn pran lo train-vapèr pou sorte Sin-Dni épi pou alé an vakans Sin-Lé. Mwin l’avé so shanss-la é an mèm tan mwin téi pé bien rogarde sak téi éspass dann lanvironeman train-la… Mwin téi oi par ébzanp kan lo train téi arète in kantité d’moune téi aporte sak zot l’avé pou vande : kissoi bande frui konm zizib, bibass, mang èk piman, kissoi bonbon tradissyonèl, kissoi ankor bande sak épi bande shapo trèssé, kissoi ankor paké poisson, krab, pti volaye.
Boudikont mwin téi panss in bonpé d’moune téi gingn zot sosso par raporte lo train.

Sé pou sa ké kan konsèye réjyonal la vouli lanss son tram-train mwin téi oi sa dann mon majinassion, la kapassité pou demoune arondi zot fin d’moi. Pa mèm manyèr ké dann tan lontan mé antouléka soulaz in pé zot difikilté avèk sak zot jéni pèrsonèl té i pèrmète azot pou ofèr lo moune dann train.
Mi oi tré bien demoune ofèr sanwich, boutèye dolo, pistash griyé, nem, samoussa épi toute sak mwin la marke an-o la… Mi oi ossi tré bien demoune alé rèst koté la gare pou gingn transpor fassilman… Lo kar, sé lo kar, mé lo kar la zamé fé rèss demoune koté la gar, é la zamé ankouraz bann pti métyé.

Nora soulaz la povrété ? Mi di pa non pars nora té possib pou in pé pran lo train pou alé travaye dann in n’ote androi, pou bande jenn alé linivèrsité pou gingn in diplôme osinonsa aprann in métyé. Mi obliye pa bande zatlyé pou répar lo train. Partou mwin la passé mwin la vi koman lo train i ankouraz la vi ékonomik donk i favoriz l’anploi.

Mi pans Paul Vergès épi konsèye réjyonal dann tan, l’avé bien vu lintéré d’in train pou dégaj in pé la rout, pou favoriz la vi ékonmik, kiltirèl, sossyal. Mi mézir lokazyon nou la manké, la prime doné pou sak téi oi pa pli loin ké zot boute né.

Sabote lo tram-train : in lérèr grav par raporte lintéré vital nout péi — A bon ékoutèr salu.

Justin