Lontan, dann tout kuizine l’avé in farfar. Sa lété konm in magazin. Ladan mèm téi mète bann provizyon manzé kisoi mayi, kisoi do ri, kisoi zognon, kisoi lo grin, kisoi mèm rézime fig. An touléka, dann provèrb malgash moin la mark an-o la i parl grenyé épi parl de ri. Sans prop lé vré : kan ou i komans tir dann out rézèrv de ri, li diminyé é mèm momandoné ou lé blijé rak lo fon. Sans figiré ? Si ou néna in shagrin d’amour, ou i pans ou sar dépité pou tout out vi épi momandoné la doulèr i komans diminyé, diminyé ziskatan li fane. Alor pou sak lé dépité pou vréman, mi done azot in konsèye : lèss lo tan pasé épi zot va oir momandoné lo linsiportab i vien siportab é konm i di, i ariv k’in pti bonèr i ranplas in gran malèr. Alé ! Mi kite azot rofléshi la dsi é ni artrouv pli d’van. Sipétadyé !