Médam, Mésyé, La sosyété, koz èk sé koz èk in kouyon-mé sé o pyé d’lo mir k’i oi lo mason. Kozman moin la mark an-o la, sa in kozman Madégaskar. Li di pa konmsa san pou san, mé li vé dir mèm zafèr ou aproshan. Li port dsi sagrin ou néna kan sak i apèl out lémé i travèrs pou alé l’ot koté. I fo antann koman sak i rès la, lo sirvivan, i plèr, i kriy, lé dézolé konm i di ziska la finn sé zour. Li rash son shévé, li la pi anvi arien, mèm Bondyé i intérèss pi ali. Sa lé vré, zordi, domin, apré domin é mèm apré-apré ankor mé i ariv in zour i rèss pi k’in dou souvénir konm i di dann « Ti flèr émé » épi l’amour konm la vi i ropran lo dési : si ou la pa tyé aou, l’anvi d’viv i vien plizanpli for é talèr ou i vé ratrap lo tan pèrdi. Lé ga, néna demoun i pans zot lé pa ranplasab-tamyé pou zot ! Mé fransh vérité, pa ranplasé lé mor o pyé. Alé ! Mi kite azot rofléshi la dsi é ni artrouv pli d’van. Sipétadyé !