Mi souvyin, nana byin lontan...nana mèm pli lontan ké lontan, moin la pass par Nosibé. Sa in l’il dann péi malgash. La done anou lo koko pou boir, nou la manz papay épi poisson griyé dan la sab. Nou té kontan...non…prèss kontan pars demoun la-ba lé mizèr, épi momandoné,na inn-dé tantine la mète a dansé. Touléka, la fé kome si…Pars pou moin zot lété apré fou d’nout tète. Moin lété pa byin ! Pars moin té apré rode in vré kiltir é moin té i trouv aryin k’in kassaz lé kui.
Lo tan la passé, moin la vi zoli z’afèr, moin la vi vilin z’afèr, moin la vi déssèrtène shoz i sone vré, épi d’ote i sone fo. Konm in moun instruiyé noré di : "Moin la rode l’"authentique" é moin la pa trouv sa toultan...in foi konmsa, rarman. Donk, si moin lété in touris é si moin té i vyin La Rényon, moin lé sir moin nora vni rode sak lé vré, sak lé authentik, sak i mète amoin an kontakt avèk bann rényoné an vré, la kiltir rényonèz an vré, nout maloya, épi toute sak i roprézant byin lo péi...Moin nora mète par koté sak lé fo, sak i abèss bann rényoné.
Na dé troi zour, l’IRT la fé son bilan pou l’ané 2009, é moin lété kontan antann lo prézidan, Pierre Vèrgès, défini lo poin prinsipal sa politik dann tourism. Pou li, i fo pa fou d’la tète bann touris, tranp azot dann in bin artifisyèl, mé plito mète azot an kontak avèk La Rényon vré, La Rényon authentik...dizon sak demoun i rod pou vréman kan zot i voiyaz.

Justin