Oté

« Sak i avans pa i rès pa an plas non pli ! »

In kozman pou la rout

Justin / 25 octob 2016

Oplis lo tan i pass, oplis mi pans sa lé vré é mèm sa lé vré dann tout sak lé pozitif dan la vi. Mi vé fé progré dann mon sakmikoné épi dann mon sakmikoné fé-i apèl sa lo savoir épi lo savoir fé. Mon l’anbisyon sé konm i di dann shomin gran boi, in gran kalité maloya : ti-pa, ti-pa, m’arivé ! Konbien rant nou lé konmsa, na sirman dis pou la douzène. Mé kan lé shoz i marsh pa ? Kan lo motèr i patine ? Ni rokil vi ké sak i avans pa i rès pa an plas non pli. Poitan si ni kalkil bien : lé pa forsé ké ni rokil si ni ramas la fors pou alé pli loin. Konmsa mèm marmaye i fé z’ot kroisans : li bouz pa, li bouz pa, li bouz pa épi tou d’in kou li pous konm in tiz banbou ! Konmsa mèm lé shoz i déblok san ké ou i atann. Optimis in ? Alé ! Ni artrouv pli d’van sipétadyé.