Médame, zé Méssyé, la sosyété, koze èk mwin sé koze èk in kouyon mé sé o pyé d’lo mir k’i oi lo masson. Mézami, mi rapèl lété dann in boutik. Mwin ti-marmaye momon l’avé anvoye amwin an komission. Kate pèrsone té i antoure la tab : zot t’apré zoué bélote zot la ! Toudinkou, lo ton la monté. Inn la di : « Simon i zoué volèr ! ». Simon la garde son kalm épi li la di kozman lé marké an-o la. Mwin la konprann zour-la in moune i pé ansèrv son pozission-li té i distribyé karte é sa téi pèrmète ali, abityé konm li lé, a konète lo zé lé zot, é a prépare in viktoir possib.

Final de konte, la vi lé konmsa. I fo wi pran lo rol pou fé avanss oute biznèss, oute zintéré. In tour dsi kate sé ou k’i done lo karte ébin si sa i ansèrv pa arien, akoz sé pa lo minm k’i done toultan ? Alé ! Mi kite azot rofléshi la dsi é ni artrouv pli d’van. Sipétadyé.