Mézami kozman — la mwin la antande sa dann in boutik étan in jenn marmaye. Sak la di sa, téi trish forséman — antouléka son bande dalon téi kroi li trish é li té i fé pa arien pou done la démanti — sof tazantan té i rofé la distribissyon d’karte osinonsa domino.

Souvan défoi néna déssèrtin i mète azot landroi larzan i pass é zot doi kolante i vien a bou trape in pé. Mi koné pa si zot la fine romarke sa, mé kissoi dann in fète, kissoi dann in sossyété, kissoi dann in zé, mi romark sé touzour lo mèm kalité d’moune k’i tienbo la kèss.

Antouléka, mwin mi di sa konmsa pars mwin mi méfyé é si i sère mon min pou di bonzour, mi konte mon doi apré. I koné zamé !

Alé ! Mi kite azot rofléshi la dsu é ni artrouv pli d’van. Sipétadyé.

Justin