Oté

« Sak i bate tanbour, la pa li k’i danss ! »*

In kozman pou la route

Justin / 29 avril 2021

JPEG - 43.6 ko

Médame, zé méssyé, la sossyété, mi panss zot i koné kozman-la, mé si zot i koné pa, ni pé anparl ansanb. Par l’fète mwin la fine anparl azot in n’ot kozman é sanm pou mwin lé pa tro loin inn par raporte a l’ote pou lo sanss. Provèrb mi di azot sé : « Sak i done la rou i ral pa sharète » é sa i vé dir done la rou sé donn in sinp kou d’min pou fé in l’éfor kourte-diré , mé ral sharète sa lé dir é sé bèf i iz son kor pou sa. An atandan kozman mwin la mark an-o la , pou mwin sa i vé dir sak i bate tanbour li pé bate vite, li pé bate dousman, é li kalkil pa son baté suivan la fatig son kor lé d’dan. Sé pou sa lo danssèr lé riskab ète fatigué é lo batèr a par k’i n fatig dann doi mi oi pa kossa i pé fémal ali ankor. Ni pé di galman sé lo batèr k’i komande mé sé lo danssèr k’i égzékite lo band pa. Sa i mérite in rofléksyon sa é sé pou sa mi lèss azot rofléshi-konm bann franssé i di, « gamberger ». Alé ! Ni artrouv pli d’van. Sipétadyé.

*kozman mwin la mark an-o la i sorte dann « somi-lo-mo » in liv Daniel Honoré, noute brav dalon dcd konm zot i koné néna déza inn-dé zour.