Médam, Méssyé, La sossyété, koz èk mwin sé koz avèk in kouyon, mé sé o pyé d’lo mir k’i oi lo masson. Mézami, souvan dé foi, mi panss kozman mwin la antann dann péi déor-la é mi di, issi shé nou, i dovré z’ète in pé konmsa. Poukoué mi di sa ? Pars, d’apré mwin kan demoun lé anparmi é zot l’apré manzé-boir , i diré néna in frin sou la lang la soté. In pé, mi panss, zot i di éksopré dé shoz pou demoun alé rakonté, mé pou in pé sanm pou mwin lo kou d’sèk i tir linibissyon é oila pou kossa dézord i pète dann lo féstin, osinonsa apré .Mon kaz, kan mwin lété marmaye, l’avé in lésprèssyon pou di sa : téi anparl bann féstin goloi ? Souvan mi panss zistoir d’famiy i souf pa sa dann zorèye demoun déor. Mi panss é mi mazine toute demoun i doi réspèk in kozman konmsa. Mé élas, Ménélass, mon kèr lé an filass konm i di in pé la fèss lé lash é lé riskab di ninporte koi. Alé ! Mi kite azot rofléshi la dsi é ni artrouv pli d’van. Sipétadyé.