Oté

« Sak i domann la plui i doi aksèp la bou »

In kozman pou la rout

Justin / 20 zwin 2018

JPEG - 43.6 ko

Dann tout shoz néna in bon avèk in mové koté. Si ou i kroi tout z’afèr lé bon san-pour-san ou i mète out doi dann out prop zyé. Pars sa sé in n’afèr lé dan la natir épi dann l’aktivité d’moun. Na poin in manyèr pou fèr otroman. Mi koné pa si i apèl sa dyaléktik mé i arsanm bien. I di pa : tout médaye néna son rovèr. Dann in tan moin lé sir in bonpé la pa konéte, téi di : in koté « tète », épi in koté « flèr ». I di pa galman : dann tout mal, néna in bien, épi vèrsi-vèrsa. Donk, si ou i vé fèr in n’afèr, si posib kalkil par avans kèl konsékans ou i vé pa, si néna in konsékans ou i vé pa, mé antansyon lo kontrèr lé bien nésésèr si ou i vé alé pli loin. Arzout èk sa la lite rant lo dé kontrèr, i di é néna rézon, sa sé lo motèr pou Listoir. Alé ! Mi kite azot pou rofléshi la dsi é ni artrouv pli d’van. Sipétadyé.