Médam zé Méssyé, la sossyété,

Fitintan demoune téi déplass an sharète mé shomin lété si tèlman mal aranzé ké la rou téi antèr dan la bou é aprésa inpossib pou lo bèf tir son mashine par li mèm , toussèl ,pou ansorte ali épi trape in boute shomin pli pratikab. Kan sa téi ariv demoune téi antour pou done la rou :sa i vé dir zot téi fé in léfor pou ède la rou tourné pou amenn la mashine dann in méyèr boute shomin.

Mé biensir done la rou sé done in kou d’min dann in tan asé kourte pars léfor prinssipal i ropoz touzour dsi la fors lo bèf…an loto ossi téi fé konmsa kissoi dann shomin an tèr, kissoi dann shomin blaké mal antrotoni.

Astèr si ni ropran noute kozman biensir ni pran in pé noute distanss par rapor la rou, la sharète, la boue épi lo shomin kass kassé pou mète a nou an sityassion dann la sossyété.Lèr-la ni konpran kan ni done in kou d’min pa pou fé lo pli gro léfor mé pou édé pa pou ranplass sak i fé léfor prinssipal mé sa i vé pa dir lo kou d’min la pa nésséssèr défoi li lé bien itil-épi lo kou d’min sé la solidarité kant mèm.

Alé ! Mi kite azot rofléshir la dsi é ni retrouv pli dvan sipétadyé...

Justin