Médame zé méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami kozman mwin la mark an-o la sa in proverb La Rényon. Mi panss bonpé rantre nou i koné kozman-la… Oussa sa i sorte ? Oila : Shomin zordi, la plipar d’tan lé a popré bon, mé dann tan mi di azot-la, la rou d’sharète lété sèrklé avèk do fèr é kan la plui té i tonm é ké shomin lété an bou, la rou téi fouye kalité krévass dann shomin é momandoné lo sharète téi rèst pri dan la bou, sansa dann la krète la tère sèk. Alor - la, lo bèf téi anpé pi, lo shartyé té i gingn pi fé arien, demoun téi ède – téi done la rou pou fé tourna li é fé avanss lo sharète. Mé té lo bèf téi fé lo pliss léfor avèk souvan-défoi kalité kou d’shabouk dsi son do, mi anparl mèm pa zot. Sans prop mé sanss zénéral, si wi done la rou, wi ède mé la pa ou k’lé désizif dann l’afèr, la pa ou k’i fé pou vréman toute lo léfor k’i fo. Alé ! Mi kite azot rofléshi la dsi é ni artrouv pli d’van. Sipétadyé.