Mézami mi pans zot i koné kozman-la. Mwin mèm la fine anparl sa inn-dé foi. Si zot i rode lo mèm parèye dann la lang bande franssé, mwin lé sir zot va trouv : Les conseilleurs ne sont pas les payeurs.

Astèr si ni rovien dsi lo zistoir done la rou, sa i rapèl amwin dann tan bonpé shomin té shomin la tère, é bande sharète l’avé gran rou sèrkllé avèk lo fèr si tèlman kan sharète téi pass ladan, té i fouye kalité séon mi di pa zot toute. Alor, dé foi lo sharète li-mèm téi rèst bloké é demoun téi vien pou ède lo bèf ansorte ali.

Sa té apèl done la rou mé inn foi lo sharète té fine sorte lorgnèr, lo bèf l’avé ka débarbote ali toussèl avèk inn-dé kou d’shabouk an pliss.

Alor, mézami la vi lé in pé konmsa. Demoune va di aou fé si, fé la, fé pa si, fé pa la, mé kan ou sar toussél pou fé oute afèr konte pa dsi baton tonton pou travèrs la rivyèr. Alé ! mi kite azot rofléshi la dsi é ni artrouv pli d’van. Sipétadyé.

Justin