Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’I oi lo mason. Mézami, réspèk bann konséyèr, akout bien sak zot i di, konpran bien zot parol, mé kan ou la fini sa, désid par ou mèm. Pou kosa mi di sa ? Pars provèrb kréol rényoné la touzour di sak moin la mark an-o la. Biensir tazantan i fo d’moun pou done la rou, kan sharète sansa loto i rèss koinsé dan la bou. Biensir lo sharète, sansa loto lé posib, zot i gingn ar pa ansort azot par zot mèm zot tousèl. Tazantan noré bézoin in l’ède mé obli pa lo l’ède principal sé sak ou i pé done aou par ou mèm. Alé ! Mi kite azot rofléshi la dsi é ni artrouv pli d’van. Sipétadyé.