Mézami, dann in pé tout lang épi tout kiltir néna kozman konm sak moin la mark an-o la. Mi pé rapèl azot provèrb shinoi solon moin té i di konmsa : « Donn in moun in poisson li va manj in zour, aprann ali péshé li va manz tou lé zour ». Boudikont, nout tout i yèm bien gagné é mèm désèrtin i kontant azot gagné mé si in moun i donn anou la konésans, dizon lo savoir fèr, nou sar kontan fèr par nou mèm, kékshoz momandoné demoun téi done anou vsan aprann anou fèr : Sé tout la diférans rant l’otonomi épi l’asistans… Zordi kan mi kalkil lédikasyon mon bann paran la done amoin, néna désèrtin bout mi yèm, épi d’ot i lèss dan mon boush é dann mon kèr in gou d’rogré. Pou kosa, Pars zot téi koné fé dé shoz, bann bèl shoz, mé zot la pa touzour aprann anou koman k’i fé. Si zot néna zanfan sansa pti zanfan, é si zot néna in kapasité d’ fèr, fé la passé san ézité : sar bon pou zot, é bon pou zot zanfan-ptizanfan. Mi kite azot rofléshi é ni artrouv pli d’van. Sipétadyé