Sa in kozman néna in bonpé d’moun i koné. Pé s’fèr mèm moin la fine mark ali an parmi bann kozman pou la rout. Mé obou dikont, sa i zène pa moin tro, pars in vérité répété dé foi é dé foi i rèss in vérité. La pa konm la mansonjri ! Répété dé foi é dé foi, i rèss in mansonjri an kontrèr d’sak bann nazi téi pans dann tan la guèr. Médam é mésyé, la sosyété, zot i koné kosa i lé ral sharète ? Sa lo rol bèf sa ! Zot i koné galman kosa i lé donn la rou ? Sa sé d’moun i fé sa, kisoi pou soulaz in pé lo bèf, kisoipou ède bèf ral sharète dann in shomin an pant, sansa pou ral in shaj in pé lour. Mé dann la sosyérté an ezénéral kosa sa i vé dir : i vé dir a popré « lo konséyèr la pa lo péyèr ». Pars konsèye in n’afèr sé inn, mé pran la résponsabilité la pa ditou la mèm shoz. Inn lé pli fasil, l’ot pli difisil. Sé pou sa, mi domann azot pou rofléshi la dsi é ni artrouv pli d’van. Sipétadyé !