Mi sort antann dann télé lo Prézidan La répiblik, par li mèm, la désid nonm mésyé Callende konm diréktèr lo CHU olèrk lo pistoné par la minis sosyalis. Lé bien ! i pé pa dir lé pa bien ! Solman kèl kalité wati-watya pou in kékshoz natirèl, sanm pou moin… Mi rapèl azot mésyé Sarkozy dann son diskour moi d’novanm 2009 l’avé di k’i fo done la priorité lo moun l’androi si nana la konpétans k’i fo.

Solman mon kèr lé amèr. Pa pou sa, mé par l’fète ké la plipar bann post résponsab dann lo piblik konm dann lo privé sé bann moun déor. Mi pans dann tan la kolonizasyon té moin pir ké sa : bann shèf sèrvis, d’apré sak moin la tandi dir, lété d’moun isi : mésyé Foucque té fi-t’in tan shèf sèrvis l’instriksyon piblik, mésyé Vergès lété shèf sèrvis la santé épi l’avé bokou d’ot lo nom la pa ariv ziska mon mémoir.

Aprésa zot i koné kosa la éspasé : i paré sé pou réspèk l’inité la fonksyon piblik pars nou lé an répiblik é ké bann fonksyonèr l’état i pé alé travaye partou é si ou lé pa kontan, ou i pran konstan. Solman koméla nana in bon pé télé é in bonpé program, é in bonpé sobatkoz é ni pé rogard sa si ni vé. Bin mi asir azot la plipar d’tan, dsi n’inport ékèl sizé mèm konsékan, sé d’moun l’androi i diskit rant zot … Moun déor sa lé rar konm korn lapin.

Sof isi shé nou La Rényon é sa i kass amoin in pé, kan mi oi koman i mépriz rényoné, isi La Rényon, soisant-diz z’ané apré la loi 1946 la soi-dizan aboli lo kolonyalis...