Mi koné pa si zot l gard fotbal mé moin lé pliské sir la plipar rant zot la gard lékip fotbal La frans zoué kont L’argentine, é an parmi sak la rogardé la plipar lété kontan mi andout pa. In pé mèm la trouv in manyèr pou déklar z’ot patriyotism fransé.
Sof !

Mi sava pa diskite dsi lo patriotism fransé. Sèl z’afèr moin la di épi moin la rodi : konm Robinet de La Serve téi di dann l’ané bann frankréol téi vanj pou in sort lotonomi pou sak zot téi apèl La koloni moin néna dé patri : inn sé La frans é l’ot sé La Rényon. Inn foi moin la fine dir sa, rant zot épi moin tout lé klèr.

Astèr ni pé poz anou in késtyon. Késtyon-la i di konmsa : si nou lé kontan La frans i gagn dann l’éspor, sa i vé dir sansa sa i vé pa dir ni ronons nout l’idantité rényonèz. Pou moin non ! Mi èm ré dann l’éspor nout péi i pouré afirm in pé son valèr. Mé pou afirm son valèr, i fopa léspor fransé i manz anou konplètman.

Donk, mi èmré nou néna in bann vré lokazyon amontr nout valèr dann léspor é la pa lo ka zordi. Si nout bann shanpyon i gingn, va di : La frans la gagné ! Si nout bann shanpyon i pèrd i pouré dir : lo rényoné la pèrd ankor in kou.

Sak i konpran la plézantri va konprann amoin, mi pans.