Pou sak i koné rogard in pé nout péi viv, La Rénion lapré batay pou son dévlopman. Sa in vré batay i mérit ali, i mérit son pèp konm diré bann mizilman "la mère des batailles”, in batay pou dévlopman dirab.
Alor so dévlopman dirab sé pou nou in ka d’vi ou d’mor konm pou in bonpé péi, in bonpé pèp sï la tèr.
Donkalor, dann in nafèr konmsa, nana sak i kroi pa, akoz zot lé tro intélizans konm di mon kamarad la pa invant zèf bouyi. Li armèt èk sa : zot lintélizans lé bordé avèk "la kouyonis".
Nana sak i s’anfout sa. An parmi nana in pé bann politik : parl azot dévlopman, zot i antan zéléksion, parl azot projé, zot i mazine koman zot va détourn sa, rienk pou kontant zot shéviye gonflé. Zot lé paré pou sign ninport koué provi k’sa i amène azot in bon rotour.
Épi, nana sak i kroi, i kroi dépi lontan épi i arèt pa. Nana sak i lèv épi toutsuit zot i kroi, zot i pans lo péi, nuit konm zour épi i arèt pa pans sa : in lavnir pou toulmoun dann péi ni viv.
Troi kalité dmoun, konm noré di Prévert : sak i kroi pa, sak i kroa-kroa, épi in ta sak i kroi. Lo plis posib.

Justin