Ala in kozman nana pou défoulé dosi ! Moin la anvi fé lir azot sa zordi, pou k’ ni anparl domin, mé nout tik-tak la pa konmsa : sé zordi ké mi doi anparlé é pa domin… In késtyon pou komansé : l’ariv azot frékant in moun in bon koup de tan ? Sirman ! É moin lé sir zot la fé la romark la pèrsone na poin in sèrtin défo, èl i pé mèm an avoir plizyèr kalité, èl lé konmsi, èl lé pa konmsa, èl na moins sansa plis lo vis ké l’izine Bofon.

Donk zot i di sé konmsa mèm la pèrsone i lé. Myé zot i pé dir, moun-la mi koné ali konmsi moin la fé ali, donk, la pa zordi li va shanjé. Zot na rézon !… Sof ké i pé ariv k’in zour la pèrsone i shanj : kisoi an mal, kisoi an bien, kisoi avèk l’inflyans in moun, kisoi apré an avoir bien kalkilé dann son tète. Ala ké nout provèrb i gingn la démanti… Sak la pa ariv pandan lontan, i ariv tou-d’in-kou. Lé shoz i shanj, lo moun i shanj é nout kozman nou té i kroi dir konmfèr li té vré san-pour-san, ala ké li lé pi vré.

Shanjmann fasad, pétète oui, pétète non, pétète shanjman pou touzour. Ni artrouv ! Pars astèr-la mon tète i komans fatigé ; rozman moin na tizane éféralgan dann mon jardin.